Lýsing
Søkt verður eftir laboranti til Náttúruvísindadeildina. Starvið er vikarstarv fyri laborant í barnsburðarfarloyvi og verður sett frá 15. august 2022 ella skjótast gjørligt eftir hetta.
Starvið
Starvið er fulltíðarstarv og fevnir m.a. um:
- Stuðulsvirksemi í samband við starvsstovuskeið og vegleiðing av studentum og øðrum starvsstovubrúkarum
- Luttøku í granskingarverkætlanum
- Starvsstovuarbeiði, so sum evna-, alis- og lívfrøðiligar analysur
- Viðlíkahald av starvsstovutólum
- Heintan og fyrireiking av sýnum til kanningar
Náttúruvísindadeildin hevur tað mesta av sínum virksemi í hølum í Sjóvinnuhúsinum í Tórshavn. Starvsstovuvirksemi er tó eisini staðsett í Nóatúni og granskingarsetrinum iNOVA í Tórshavn.
Lønin er sbrt. sáttmála millum Fíggjarmálaráðið og avvarðandi fakfelag.
Førleikar
Vit vænta at tú:
- hevur útbúgving sum laborantur, laboratoriiteknikari ella aðra viðkomandi útbúgving
- hevur viðkomandi starvsroyndir
- ert opin fyri at læra nýtt
- ert røkin og megnar at arbeiða sjálvstøðugt og neyvt
- hevur góð samskiftis- og samstarvsevni
- hevur kunnleika til vanlig telduforrit
- dugir at samskifta á skandinaviskum og enskum
Tað er ein stórur fyrimunur, um tú hevur royndir við at leggja undirvísing í starvsstovu til rættis, tí hetta er týðandi partur av arbeiðinum. Tað er somuleiðis ein fyrimunur, um tú hevur royndir við at arbeiða við DNA/RNA (PCR, DNA sekventering), massaspektrometri og øðrum viðkomandi starvsstovuhættum (t.d. elektroforesu, mikroskopering). Náttúruvísindadeildin arbeiðir bæði í gransking og undirvísing við at menna nútíðar sekventeringshættir og bioinformatiskar analysur, og tú fert eisini at luttaka í hesum arbeiðinum.
Umsóknin
Umsókn við avriti av prógvum, CV og møguligum viðmælum skal sendast við telduposti til umsokn@setur.fo við viðmerkingini “Laborantstarv”. Umsóknarfreistin er 16. juni 2022.
Nærri upplýsingar
Nærri fæst at vita um starvið við at venda sær til Svein-Ole Mikalsen á teldupostadressu sveinom@setur.fo við evninum “Laborantstarv” ella á tel. 292556. Upplýsingar um Fróðskaparsetur Føroya eru at finna á www.setur.fo
Um Fróðskaparsetrið
Fróðskaparsetur Føroya er Føroya týdningarmesti hægri útbúgvingar- og granskingarstovnur. Virksemið á Fróðskaparsetrinum er gransking og granskingargrundað undirvísing, har samvirkan millum hesi bæði hevur til endamáls at tæna skiftandi tørvum og raðfestingum í føroyska samfelagnum og umhvørvinum um okkara leiðir.
Á Fróðskaparsetrinum eru umleið 100 undirvísarar og granskarar, eini 40 starvsfólk í fyrisitingini og okkurt um 1000 lesandi. Fróðskaparsetrið fevnir um fimm deildir og eina miðfyrisiting. Í øllum okkara virki er tað okkara skylda at veita javnbjóðis møguleikar, virka fyri inklusión og at stimbra trivnaðin hjá okkara lesandi og starvsfólki í einum umhvørvi, har øll kunnu mennast.
