Lýsing
Dámar tær at vera úti – í regni, sól og vindi – saman við børnum, sum spæla og læra í náttúruni?
Vit leita eftir námsfrøðingi, hjálparfólki ella námsfrøðilesandi til eina lítla stovu, har vit eru nógv úti. Á stovuni starvast í løtuni tveir námsfrøðingar og tvey hjálparfólk. Starvið er 30–40 tímar um vikuna og vit eru klár at taka ímóti tær skjótast gjørligt.
Um okkum:
Barnagarðurin á Mýrunum liggur beint við Toftavatn – tí grønu og fríu náttúruperluni. Vit spæla nógv í náttúruni, forvitnast eftir fuglum og kyktum og brúka náttúruna sum eitt menningaramboð. Vit ganga túrar og vitja Bylgjuna, Bókasavnið og Ellisheimið og skapa ein gerandisdag, har børnini eru virkin og forvitin.
Á stovninum eru fýra barnagarðsstovur og tvær vøggustovur. Stovnurin er normeraður til 104 børn, 0–6 ár. Útibarnagarðsstovan heldur til í Skótahúsinum, skamt frá Barnagarðinum á Mýrunum. Í útibarnagarðsstovuni ganga uml. 12 børn í aldrinum 3-5 ár.
Vit leita eftir tær, sum:
- Ert námsfrøðingur, námsfrøðilesandi ella hevur aðrar viðkomandi royndir
- Elskar at vera úti og vil skapa ein tryggan og spennandi gerandisdag fyri børnini
- Hevur hug at brúka náttúruna sum eitt kreativt amboð í dagliga virkseminum.
Vit bjóða tær:
- Eitt arbeiðspláss við náttúruni og børnunum í miðdeplinum
- Gott fakligt samstarv við dugnaligum - og hugnaligum - starvsfeløgum.
- Møguleika at seta tín dám á gerandisdagin
Hvussu søkir tú?
- Send møgulig prógv ella viðkomandi skjøl umvegis www.alfred.fo
- Umsóknarfreist: 7. desember – samrøður vera dagin eftir freistina, ella eftir nærri avtalu.
- Starvið verður sett sambært sáttmála millum Pedagogfelag Føroya og Kommunala Arbeiðsgevarafelag Føroya (KAF).
- Spurningar um starvið? Ring til Oslu Olsen, leiðara, á tlf. 237880
Sambært §2 í barnaváttanarlógini hevur Runavíkar kommuna skyldu at fáa til vega barnaváttan áðrenn starvsbyrjan.
Vit gleða okkum at hoyra frá tær!
