Lýsing
Tekniska fyrisiting í Tórshavnar kommunu søkir eftir einum fram- og víðskygdum býarverkfrøðingi.
Býarverkfrøðingurin er deildarleiðari fyri Teknisku deild, sum umsitur alla myndugleikaviðgerð í samband við kommunala infrakervið og ferðslu í kommununi. Deildin hevur somuleiðis ábyrgd av planlegging, gerð av strategiskum ætlanum og støðulýsingum av somu økjum. Eisini umsitur býarverkfrøðingurin allar íløgur og verkætlanir innan infrakervið og ferðslu, sum seinastu 10 árini tilsamans hava verið 575 mió kr., umframt at verkætlanir í samband við kommunalar útstykkingar eisini koma undir ábyrgd býarverkfrøðingsins.
Býarverkfrøðingurin er leiðari fyri rakstarstovnarnar fyri vegir, spillvatn, reinhald, kavarudding og gøtuljós, vatnveiting, og verkstaðið hjá kommununi. Hesir stovnar hava egnar rakstrarleiðarar, sum vísa til býarverkfrøðingin. Tað starvast umleið 80 ársverk á rakstrarstovnunum. Býarverkfrøðingurin varðar av eini rakstarjáttan á uml. 110 mió kr.
Býarverkfrøðingurin er partur av leiðslutoyminum í teknisku fyrisiting, sum umframt Teknisku deild eisini umfatar Býarskipanar-, Byggimáls-, Bygnings- og Umhvørvisdeildina. Samstarvið millum hesar deildir er týðandi partur av arbeiðinum sum býarverkfrøðingur, umframt at nógv samstarv eisini er við innan- og uttanhýsis samstarvspartnarar.
