Lýsing
Skapa virði úr dátum!
Vit leita eftir tær, sum vil gagnnýta og skapa virði úr okkara dátum og megnar at greiða øðrum frá, hvussu dátur hanga saman, og soleiðis gera fløkt til einfalt.
Tú kemur at savna og greina stórar dátumongdir frá ymisku talgildu skipanunum hjá strandferðsluni og menna loysnir – bæði til innanhýsis og uttanhýsis brúk. Harumframt kemur tú at gera fløkt dátugrundarlag lætt at skilja og greiða frá sambondunum millum dátur.
Tú verður partur av fíggjardeildini, men arbeiðsuppgávurnar eru tvørgangandi. Hetta merkir, at tú fer at samstarva við leiðsluna og lyklapersónar á øllum deildunum í fyrisitingini, eins og at hava samskifti og samstarv við uttanhýsis ráðgevar í samband við serligar uppgávur.
Starvið
Tú fert at hava ábyrgd av Power BI umhvørvinum hjá strandferðsluni, herundir at byggja, hava eftirlit og viðlíkahalda rapportir og umhvørvir.
Í tøttum samstarvi við ymiskir aktørar fert tú at verða partur av menningini av bíleggingarskipanini hjá strandferðsluni, betra um tilgongdir og dátugóðskuna. Arbeiðið fevnir eisini um at gera fíggjarligar greiningar saman við fíggjardeildini, greina rák saman við samferðslu- og rakstrardeildini, gera lønargreiningar við lønardeildini og ad hoc greiningar, í samstarvi við leiðsluna.
Eisini hevur tú ábyrgdina av, at tryggja dátugóðsku við miðvísari kvalifisering og staðfesting, so tvítøk, ójavnir og feilir verða burturbeindir, áðrenn dátur verða brúktar til greiningar.
Førleikar
Vit leita eftir tær, ið hevur:
- Útbúgving frá hægri lærustovni innan dátugreining ella líknandi fakøki.
- Royndir við dátugreining og viðkomandi amboðum, t.d. bíleggingar- og ferðaseðlaskipanum, SQL, Microsoft 365 (serliga víðka Excel), ERP-skipanir og Power BI.
- Kunnleika til almenna fyrisiting og talgildar skipanir hjá Gjaldstovuni, harumframt kodumál sum Python/R verður mett sum ein fyrimunur.
- Vitan um fíggjarligar dátustrukturar og handfaring er ein stórur fyrimunur.
Persónligir eginleikar:
- Arbeiðir skipað og sjálvstøðugt við ábyrgd og yvirliti.
- Dugir væl at samskifta og samstarva, bæði í toymi og við ymiskir áhugapartar.
Umframt førleikar í nevndu skipanum er tað ein fyrimunur at hava vitan og royndir við at byggja og viðlíkahalda dátumodellir, sum gera greiningar og visualiseringar lættari.
Setanar- og lønarviðurskifti
Starvið verður lønt eftir sáttmála millum Fíggjarmálaráðið og avvarðandi fakfelag. Talan er um fulltíðarstarv, ið ætlandi verður sett 1. januar 2026 ella skjótast til ber eftir hetta. Freistin at søkja starvið er 15. desember 2025.
Meira fæst at vita um starvið við at venda sær til Dan Djurhuus, fíggjarleiðara á 293021 ella á dad@ssl.fo
Hevur hetta tín áhuga? Trýst á “Søk starvið”, fyll út umsóknarblaðið og legg umsókn, CV og avrit av prógvum við. Vit gleða okkum at hoyra frá tær!
Um Strandfaraskip Landsins:
Strandfaraskip Landsins (Strandferðslan) er landsfyritøka undir Fiskivinnu- og samferðslumálaráðnum. Endamálið við Strandferðsluni, sum er ásett við lóg, er at lúka landsins tørv á innanlands fólka- og farmaflutningi. SSL virkar við spjøddum virksemi kring landið allar dagar í árinum frá árla á morgni til út á midnátt. Strandferðslan umsitur í dag tilsamans 30 farleiðir - 7 oyggjaleiðir og 23 bygdaleiðir. Til at røkja hesar 30 farleiðirnar eru átta ferjur og 48 bussar. Í 2023 var samlaða ferðafólkatalið knappar 1,25 millión. Av hesum ferðaðust umleið 725 túsund við ferjunum og 520 túsund við bussunum. Flutt blivu 188 túsund akfør. Í 2024 verða tølini ávikavist 230 túsund og 62 túsund lægri, tí sjóvegis Sandoyarleiðin fellir út. Nýggj landvegis farleið er sett á stovn í samband við undirsjóvartunnilin. Starvsfólkahópurin hjá Strandferðlsuni er umleið 180 fólk. Fyrisitingin er skipað í fíggjar-, samferðslu-, rakstrar-, kt- og starvsfólkadeild umframt stjórnarskrivstovu. Høvuðsskrivstovan er á Tvøroyri.
