Heilsufrøðiliga starvsstovan søkir eftir deildarleiðari til veterinerdeildina

Arbeiðsuppgávur
Deildarleiðarin á veterinerdeildini hevur fakligu leiðsluna av deildini og skal tryggja at arbeiðið er í samsvari við galdandi lógir og kunngerðir á økinum. Deildarleiðarin raðfestir og hevur ábyrgd av at skipa arbeiðið á deildini og at fylgja við altjóða gongdini innan djórasjúkur og djóravælferð við serligum denti á sjúkufyribyrging í alivinnuni.

Deildarleiðarin á veterinerdeildini er partur av leiðslubólkinum á Heilsufrøðiligu starvsstovuni.

Krøv til útbúgving og aðrar viðkomandi førleikar

• Útbúgving sum djóralækni.
• Hevur koyrikort til bil.
• Dugir væl at samskifta á føroyskum í skrift og talu ella á øðrum nærskildum norðurlendskum máli.
• Dugir at samskifta á enskum.
• Hevur góðan telduførleika.

Væntanir
Tú skalt hava fyrisitingarligt tev og altíð tryggja at myndugleikauppgávan er í hásæti.

Vit ynskja umsøkjarar sum hava gott hegni at leiða, eggja til samstarv og duga at skapa trivnað í einum arbeiðsdegi, sum kann koma undir stórt trýst.

Tað er ein fyrimunur um umsøkjarar hava fakligar starvsroyndir við alifiski eins og øðrum djórum. Somuleiðis eru leiðsluroyndir ein fyrimunur.

Annað
Sum embætisdjóralækni luttekur tú í vaktarskipanum fyri djóralæknauppgávur, bæði í og uttan fyri vanliga arbeiðstíð.

Setanarviðurskifti
Starvið er fulltíðarstarv at byrja skjótast gjørligt.

Lønin verður sambært sáttmála millum Fíggjarmálaráðið og Akademikarafelagið við viðbót sum deildarleiðari 2. Haraftrat verður veitt autorisatiónsviðbót sum embætisdjóralækni.

Umsóknarfreist
Umsóknir til starvið við avriti av prógvi, lívsrensli, viðmælum o.tíl. skal sendast Heilsufrøðiligu starvsstovu, Smyrilsvegur 7, 100 Tórshavn, ella hfs@hfs.fo.  Umsóknir skulu verða okkum í hendi í seinasta lagi fríggjadagin 26. november 2021 kl. 12.00.

Fleiri upplýsingar fáast við at venda sær til Bárð Enni, stjóra á telefon 55 64 00.

Heilsufrøðiliga starvsstovan er stovnur undir Umhvørvis- og vinnumálaráðnum. Stovnurin umsitur m.a. matvøru-, djórasjúku-, djóravælferðar-, djóralækna-  og alilógina og rekur kanningarstovu í hesum sambandi.

Høvuðsuppgávurnar hjá veterinerdeildini eru at tryggja góða djóraheilsu og djóravælferð við serligum denti á alifisk og fyribyrgja at sjúka ikki spjaðist.