Lýsing
Um starvið
Talan er um eitt fast starv 40 tímar um vikuna at seta 01.04.2025 ella eftir nærri avtalu. Arbeitt verður allar dagar í vikuni millum kl. 07 og 21.30. Arbeitt verður 3. hvørt vikuskifti. Starvsstaðurin er í Stoffalág 64 í Havn.
Arbeiðsuppgávur
Høvuðsuppgávan er at veita einum búfólki við menningartarni neyðugan stuðul og umsorgan og virka fyri, at viðkomandi fær ein innihaldsríkan og mennandi gerandisdag. Somuleiðis at virka sum hjálp til sjálvhjálp við tí endamáli, at búfólkið fær møguleika at liva eitt so sjálvstøðugt, virkið og virðiligt lív, sum til ber. Uppgávan er at ráðgeva og stuðla í persónligum, sosialum og praktiskum viðurskiftum og at gera dagarnar innihaldsríkar og mennandi.
Í námsfrøðiliga arbeiðinum leggja vit dent á sjálvsavgerðarrættin hjá tí einstaka, menning og sjálvbjargni. Vit brúka t.d. ferðsluljósmetoduna og boardmaker sum amboð til at skipa gerandisdagin. Eisini leggja vit stóran dent á low arousal-námsfrøði.
Áðrenn starvsbyrjan verður skipað fyri innleiðsluskeiði við upplæring í omanfyrinevndu háttaløgum eins og arbeiðsmannagongdunum á staðnum.
Búfyriskipanin hevur eisini tætt samstarv við Sambýlið í Stoffalág.
Møguleiki er at fáa tíðaravmarkaðar samskiparauppgávur eftir tørvi. Samskipari er leiðarans forlongdi armur á staðnum. Samskiparin hevur ábyrgd av uppgávum, ið krevja nærleika, fyri at virksemið á staðnum koyrir skynsamt. Samskiparar fáa eina tíðaravmarkaða viðbót upp á 2.000,- um mánaðin sambært sáttmála.
