Lýsing
Felagsgoymslan á Landssjúkrahúsinum søkir eftir dugnaligum skrivstovufólki til áhugavert og sjálvstøðugt starv. Talan er um fast fulltíðarstarv, við starvsbyrjan 01.03.2025, ella eftir avtalu.
Á felagsgoymsluni umsita vit allar nýtsluvørur til føroyska heilsuverkið, stovnar og borgarar.
Um starvið
Tú fert at hava uppgávur í sambandi við handfaring og kontering av fakturum, innkeyp og bílegging av vørum til Sjúkrahúsverkið, umframt veitingar til almennar stovnar og brúkarar / borgarar kring alt landi. Harumframt er bæði skrivligt og munnligt samskifti við okkara viðskiftafólk.
Komandi tíðina fer virksemi hjá Felagsgoymsluni at flyta í nýggja H-bygningin. Í sambandi við flytingina í nýggju hølini, verður nógv av núverandi arbeiðsuppgávum umskipað og nýggjar arbeiðs- og mannagongdir skulu setast í verk. Tú fert, saman við øðrum starvsfólkum í Felagsgoymsluni, at vera við til at gera hesar mannagongdir.
Fyrstu tíðina fert tú at vera partur av samskipanini at flyta virksemi hjá Felagsgoymsluni í H-bygningin, har bæði nýggj sterilgoymsla og vørulyfta verður partur av nýggju arbeiðsgongdini. Dagliga virksemi á Goymsluni heldur fram meðan flutt verður. Títt arbeiðspláss verður tí í núverandi Felagsgoymsluni á Eirargarði, og síðani í H-bygninginum. Tú mást tí tola broytingar í bæði starvi og starvsinnihaldi.
