Lýsing
Um starvið
Talan er um barsilsfarloyvisstarv 32 tímar um vikuna at seta frá 01.05.25, ella eftir avtalu, og eitt ár fram. Arbeitt verður gerandisdagar í dagtímunum, og starvsstaðurin er í Saltangará.
Arbeiðsuppgávur
Verkhúsið Stíggjur er eitt arbeiðspláss fyri fólk við menningartarni, sum ikki kunnu røkja arbeiði á arbeiðsmarknaðinum undir vanligum treytum. Verkhúsið heldur til á trimum støðum í Saltangará. Á leið 30 borgarar koma dagliga í Stíggjan, og har starvast 13 fólk við ymiskari bakgrund, flestu av teimum námsfrøðingar. Flestu starvsfólk eru til skiftis í øllum trimum støðunum.
Vit hava ymisk verkstøð, so sum ítrivsverkstað, máliverkstað og træverkstað. Teir borgarar, sum ikki kunnu vera við í framleiðsluni, fáa positivar og sansastimbrandi upplivingar, kropsligar venjingar, ADL-venjingar umframt umsorgan og tryggleika. Eisini hava vit eina krambúð, sum umframt at vera eitt lítið verkstað, selur vørurnar, sum vit framleiða.
Arbeiðsuppgávurnar eru nógvar og fjølbroyttar og snúgva seg í høvuðsheitum um at stuðla og stimbra borgaran í at fáa ein mennandi og virknan gerandisdag.
