Lýsing
Búnaðarstovan sóknast eftir einum dugnaligum gartnara, gartnaratøkningi ella øðrum við førleikum í grønmetisframleiðslu til at arbeiða við menning av grønmetisdyrking í Føroyum.
Starvið verður sett á Búnaðarstovuni í Kollafirði, men í fyrstu syftu verður starvsstaðurin fyrst og fremst heima á Sandi, og í verkligum samstarvi við nærumhvørvið, áhugabólkar, jarðarbrúkarar og áhugafelagsskapin Veltuna. Arbeiðið kemur partvís at vera framhald av royndarvirkseminum heima á Sandi í 2024.
Arbeiðsuppgávurnar verða fjølbroyttar, og m.a. vænta vit, at verkligar grønmetis-royndir verða gjørdar bæði úti og undir taki heima á Sandi í samstarvi við m.a. Veltuna.
Starvsetti hevur tilvísing til landbúnaðarráðgevan á Búnaðarstovuni og má somuleiðis tola tillagingar í ávikavist bæði starvsstaði og starvsuppgávum.
Arbeiðsuppgávurnar eru m.a. at:
- Ráðgeva limunum í Veltuni og øðrum áhugaðum kring um í landinum um veltingarhættir, grønmetissløg og annað.
- Skipa fyri skeiðum og upplýsandi tiltøkum saman við Veltuni, Búnaðarstovuni og øðrum.
- Gera egnar royndir og skjalfesta úrslitini av hesum.
Vit leita eftir einum fólki, sum dámar at virka við til at seta dagsskránna fyri arbeiðinum, eins og sjálvt at skipa sær dagliga arbeiðið. Einum fólki, sum hevur hegni til at læra frá sær, og sum kann samstarva við leik og lærd.
Vit vænta, at tú er útbúgvin gartnari/gartnaratøkningur ella hevur aðra viðkomandi útbúgving við samsvarandi førleikum.
Starvið verður lønt sbrt. sáttmála við viðkomandi yrkisfelag.
Umsóknarfreistin er 19. februar 2025.
Miðað verður eftir at seta starvið frá 1. mars 2025, ella sum skjótast eftir hetta.
Meira fæst at vita um starvið við at venda sær til Jens Ivan í Gerðinum, landbúnaðarráðgeva á Búnaðarstovuni, tlf. 299012.
Umsóknir skulu sendast:
Búnaðarstovuni
Frammi í Dali 166
410 Kollafjørður
Teldupostur: bst@bst.fo
Frámerk umsóknina við: gartnari/gartnaratøkningur í grønmetisframleiðslu.
Veltan er eitt áhugafelag fyri øll, sum fáast við velting og grønmeti.
Búnaðarstovan er stovnur undir Uttanríkis- og vinnumálaráðnum, sum ráðgevur í landbúnaðarmálum.
