Lýsing
Tjóðsavnið søkir eftir fornfrøðingi at seta í starv fulla tíð í eitt tvey ára tíðaravmarkað starv frá 1. mars ella skjótast gjørligt. Setanin kann leingjast við 1-2 árum, um báðir partar ynskja tað.
Tjóðsavnið eigur ein hóp av lutum á goymslu, sum í 2024 fekk staðfest blámusopp. Í hesum sambandi er Tjóðsavnið farið undir eina verkætlan, har høvuðsendamálið er at reinsa, skráseta, pakka og flyta allar lutir Tjóðsavnsins í onnur fyribils goymsluhølir. Fornfrøðingurin kemur at arbeiða í hesum verkætlanartoymi.
Talan er um eitt týdningarmikið og áhugavert starv, har arbeitt verður við fornfrøðiliga gripatilfarinum í Føroyum, sum er funnið síðani fyrstu útgrevstrarnar í 40’unum og fram til í dag.
Tjóðsavnið er eitt gott arbeiðspláss við nógvum ymiskum fólkum, útbúgvingum og førleikum, og vit leggja dent á trivnað og góð sosial tiltøk.
Høvuðsuppgávurnar hjá fornfrøðinginum eru:
- At handfara og reinsa fornlutir
- Fornfrøðiligar metingar av lutum
- At skráseta lutir í SARA (t.e. savnsskrásetingarskipanin)
- At seta skrásetingarnr. á lutir
- Avmynda lutir
- Umpakka og flyta lutir
- Annað savnsarbeiði
Førleikar:
- Útbúgving: Bachelor/kandidatur í fornfrøði
- Nærlagni
- Systematisk/ur og nágreinilig/ur
- Kunna arbeiða sjálvstøðugt og í toymi
- Fyrikomandi, góð samstarvsevni og ágrýtni
- Koyrikort
Lønar- og setanartreytir
Starvið verður sett og lønt sambært sáttmála millum Fíggjarmálaráðið og Akademikarafelag Føroya.
Fleiri upplýsingar
Meira fæst at vita um starvið við at seta seg í samband við Helga D. Michelsen, savnsvørð helgi@savn.fo tlf. 340553 ella Juliannu Mørkøre Dalbø, goymsluvørð og verkætlanarleiðara, julianna@savn.fo tlf. 340580.
Umsókn
Umsókn við avriti av prógvum, CV og viðkomandi skjølum skulu sendast gjøgnum skipanina Alfred: https://alfred.fo/starv/fornfroedingur-til-tjodsavnid
Umsóknir skulu vera Tjóðsavninum í hendi í seinasta lagi sunnudagin 26. januar.
Tjóðsavnið er eitt náttúru- og fornminnissavn. Høvuðsuppgávan hjá Tjóðsavninum er at savna inn, skráseta, varðveita og granska og miðla í náttúru- og mentanarvirðum landsins. Savnið skal fremja upplýsing og útbúgving innan mentan og náttúru, so stuðlað verður undir samfelagsmenningini, samstundis sum savnið vegna landið umsitur lóggávu og stuðulsskipanir á økinum. Tjóðsavnið skal miðla arbeiðið á stovninum gjøgnum útgávur, framsýningar, tiltøk og undirvísing fyri ung og gomul.
