Lýsing
Føroya Rættur søkir eftir einum dugnaligum og ágrýtnum løgfrøðilesandi at byrja skjótast til ber. Starvið er fyribils tíðaravmarkað til 6 mánaðir, men vit vænta, at setanin kann leingjast.
Um Føroya Rætt
Føroya Rættur heldur til í miðbýnum í Havn og hoyrir undir Eystara Landsrættardømi. Rættarmálið er bæði føroyskt og danskt. Í løtuni starvast ein sorinskrivari, ein dómari, tveir rættarassessorar, tveir dómarafulltrúar, 18 skrivstovufólk og ein næmingur í rættinum.
Vit bjóða tær
Eitt spennandi og fakliga avbjóðandi lestrarstarv við fjølbroyttum og ábyrgdarfullum arbeiðsuppgávum. Tú fært møguleika at arbeiða sjálvstøðugt og at fáa innlit í arbeiðið hjá rættinum og tey ymisku málsøkini.
Tú fert at arbeiða við uppgávum í øllum deildum hjá rættinum og verður partur av einum arbeiðsplássi, har vit leggja dent á gott samstarv, góðan starvsfelagsskap og eitt gott arbeiðsumhvørvi.
Vikuliga arbeiðstíðin verður avtalað eftir tørvi og kann tillagast lesnaðinum. Vanliga verður talan um í miðal 8–15 arbeiðstímar um vikuna. Vit eru lagalig í sambandi við próvtøkur og frítíð. Møguligt er at arbeiða fleiri tímar eftir nærri avtalu.
Arbeiðsuppgávurnar fevna millum annað um
- at menna vitanar- og dómssavnið hjá rættinum
- løgfrøðiliga fyrireiking av málum
- at skriva løgfrøðilig upprit
- at hava ábyrgd av at dulnevna og almannakunngera dómar á heimasíðuni hjá rættinum.
Vit vænta, at tú
- hevur góðar fakligar og ástøðiligar førleikar
- dugir væl at orða teg bæði skrivliga og munnliga
- ert ágrýtin, ábyrgdarfull/ur og álítandi
- hevur gott lag og góð samstarvsevni
- hevur góðar KT-førleikar
- hevur staðið 1. árið á bachelorútbúgvingini í løgfrøði og hevur í minsta lagi 1 ár eftir av lesnaðinum.
Tað er ein fyrimunur, um tú dugir føroyskt í skrift og talu og hevur innlit í føroyska lóggávu, føroysk samfelagsviðurskifti og føroyska mentan. Hetta er tó ikki ein treyt fyri at søkja starvið.
Løn og setanartreytir
Sum lesandi í starvi verður tú sett/ur við Føroya Rætti sum setanarøki.
Løn og setanartreytir eru sambært felagssáttmálanum millum danska Fíggjarmálaráðið og OAO og organisatiónsavtaluni fyri skrivstovufólk v. fl. herundir § 35 í avtaluni um setan av lesandi (HK).
Vilt tú vita meira?
Tú ert vælkomin at seta teg í samband við dómarafulltrúa Ivalu í Ólavsstovu á tlf. +298 31 10 03, um tú vilt vita meira um starvið ella setanartreytirnar.
Tú kanst eisini lesa meira um Føroya Rætt á heimasíðuni hjá rættinum www.domstol.dk/faeroeerne.
Umsókn
Send umsóknina til post@sorinskrivarin.fo.
Saman við umsóknini skalt tú senda lívsrensl (CV), prógv við próvtølum og møgulig viðmæli.
Umsóknin skal vera okkum í hendi í seinasta lagi 29. oktober 2026.
Vit mæla øllum, sum hava áhuga og eru skikkað, til at søkja starvið uttan mun til persónlig viðurskifti sum aldur, kyn, rasa, etniskan uppruna o.a.
