Lýsing
Vit sóknast eftir
Fysioterapeutum til fysio- og ergoterapieindina, Ven og Virka. Talan er um eitt fast starv á starvsbroti 1,0 frá 17. august 2026 ella eftir nærri avtalu. Møguleiki er fyri lægri starvsbroti. Harafturat er talan um eitt tíðaravmarkað starv á starvsbroti 1,0 ella lægri starvsbroti í tíðarskeiðnum 17. august til 31. desember 2026. Møguliga kann tíðaravmarkaða starvið leingjast.
Ábyrgdarøkið hjá tær verður at virka í einum tvørfakligum toymi, hvørs uppgáva er:
- At kanna, greina og meta um virkisførleikar og í mun til hetta at seta átøk í verk til eldri borgarar
- At stuðla undir, at eldri borgarar varðveita, menna ella endurvinna sínar virkisførleikar
- At veita endurvenjing og viðlíkahaldsvenjing til eldri borgarar
- At veita heilsufremjandi og sjúkufyribyrgjandi venjingar og onnur átøk fyri eldri borgarar
- At virka í tvørfakligum toymisarbeiði í samdøgursrehabilitering og heimarehabilitering
- At undirvísa og vegleiða starvsfólkum, borgarum og avvarðandi
Arbeiðið hjá fysioterapeutunum fer fram í venjingarhølinum hjá Ven og Virka í Klaksvík og á Viðareiði, heima hjá borgarum í Norðoyggjum og á búeindunum í Norðoya Bú- og Heimatænastu, NBH.
Ven og Virka er skipað við einum deildarleiðara, sum er fysioterapeutur og einum leiðandi ergoterapeuti. Umframt teir starvast 3 fysioterapeutar, 2 ergoterapeutar og tveir heilsurøktarar. Deildin er eisini lestrarpláss fyri fysioterapi- og ergoterapilesandi.
