Lýsing
Søkt verður eftir dugnaligum og virkisfúsum málsviðgera til matrikuløkið á Umhvørvisstovuni. Hevur tú áhuga fyri uppmáting og skráseting av fastari ogn, og ert tú tøkniliga tilvitað/ur og nágreinilig/ur í tínum arbeiði, so eru 2 størv á Matrikul leys at søkja.
Førleikar
Málsøkið fevnir um uppgávur innan landmáting og matrikulera málsviðgerð. Hóskandi útbúgving er m.a. innan landmáting, konstruktión, bygging ella líknandi. Men hevur tú útbugving innan málsviðgerð og fyrisiting, ert tú eisini vælkomin at søkja. Tað er ein fyrimunur at hava royndir við matrikulerum arbeiði, útskifting og uppmáting við GPS, totalstatión og tekniforritinum Microstation. Koyrikort er ein treyt.
Við bjóða
Umhvørvistovan er eitt arbeiðspláss við góðum trivnaði og góðum samstarvi millum fakbólkar. Vit bjóða tær eitt spennandi starv á einum stovni við sera fjølbroyttum uppgávum, har tú fært góðar møguleikar at menna tínar førleikar. Tú kemur at arbeiða sjálvstøðugt, men samstundis í tøttum samstarvi við deildarleiðaran og hini starvsfólkini á deildini.
Vit vænta
Vit vænta at tú ert ábyrgdarfull/ur, hevur góð samstarvsevni og áhuga fyri at menna matrikulera arbeiðsøkið. Tú hevur góð samskiftisevni, bæði í skrift og talu, og dugir væl at samskifta við viðskiftafólk. Vit leggja dent á, at tú sært nýggjar og fjølbroyttar uppgávur sum avbjóðingar, og at tú røkkur teimum málum, sum tú setur tær.
Setan
Størvini eru fulltíðarstørv og verða sett sambært sáttmála millum Fíggjarmálaráðið og Starvsfelagið.
Fyrispurningar
Nærri upplýsingar um størvini fáast við at venda sær til: Jeppe Sommer Bruun, deildarleiðara, tlf +298 34 24 24 (jeppeb@us.fo).
Umsókn
Skrivlig umsókn, saman við prógvum, CV o.l., skal sendast Umhvørvisstovuni í seinasta lagi 12. juni við telduposti til starv@us.fo viðmerkt ’Málsviðgeri til Matrikul’
Umhvørvisstovan er stovnur undir Umhvørvis- og vinnumálaráðnum - sí www.us.fo.
