Lýsing
Í sambandi við víðkan av virksemi, verður søkt eftir fólki at ráðgeva foreldrum at barni við autismu og/ella ADHD/ADD.
Um starvið
Talan er um tvey størv 40 tímar og eitt starv 24 tímar um vikuna at seta skjótast til ber. Møguleiki er fyri niðursettari arbeiðstíð. Starvsstaðurin er í Havn, og arbeiðstíðin er mánadag til fríggjadag í dagtímunum.
Arbeiðsuppgávur
Heimaráðgeving er deild, ið veitir námsfrøðiliga ráðgeving til foreldur/avvarðandi, ið hava dagliga umsorgan fyri barni við týðandi likamligum ella sálarligum breki ella varandi sjúku. Tað arbeiða í løtuni níggju fólk á deildini.
Endamálið við ráðgevingini er, at familjan fær ta hjálp og stuðul, tey hava tørv á, soleiðis at tey fáa ein so vælvirkandi gerandisdag sum til ber.
Arbeiðsuppgávurnar eru fjøltáttaðar og fevna millum annað um at
- ráðgeva foreldrum/avvarðandi í teirra heimi
- skipa fyri undirvísing um brekið ella sjúkuna
- gera amboð, ið m.a. stuðla undir ein væl skipaðan gerandisdag
- luttaka á netverksfundum
Ráðgevingin tekur støði í, at tað eru foreldrini, ið kenna barnið best. Uppgávan hjá ráðgevanum er, saman við foreldrunum, at finna hóskandi loysnir.