Lýsing
Almannaverkið søkir eftir fakligum ráðgeva við góðum greiningarevnum til verkætlanararbeiði í Tankasmiðjuni.
Um starvið
Talan er um fast starv fulla tíð at seta skjótast gjørligt. Møguleiki er at tillaga tímatalið. Arbeitt verður gerandisdagar í dagtímunum, og starvsstaðurin er í høvuðssætinum hjá Almannaverkinum á Staravegi 18 í Havn.
Arbeiðsuppgávur
Tankasmiðjan er ein verkætlanarstýrdur partur av Stjórnarskrivstovuni í Almannaverkinum. Tú vísir til deildarleiðaran í Stjórnarskrivstovuni, men uppgávurnar eru knýttar beinleiðis at stjórn.
Tú fert at veita stjórn serkøna ráðgeving í málum, ið fevna um allan stovnin við framtíðini í huga. Høvuðsuppgávan er at gera kanningar, greiningar og lýsingar av sosialum viðurskiftum og framtíðar útlitum og møguleikum á sosiala økinum í Føroyum. Í starvinum krevst eitt tætt samskifti við eindir og deildir í Almannaverkinum, men eisini samskifti við uttanhýsis aktørar og samstarvspartar hjá Almannaverkinum.